“Titanik”, publikohen dëshmitë materiale

Seanca gjyqësore “Titanik” për parregullsitë zgjedhore, ka vazhduar me publikimin e dëshmive materiale. Prokurorja Speciale Lile Stefanova nxori kartat e identifikimit, kërkesa për kartë identifikimi, fragmente nga llogaritë, certifikatat dhe dokumente të tjera.

Sipas aktakuzës, kartat e identitetit janë bërë me urdhër të zyrtarëve të VMRO-DPMNE-së për nevojat e partisë për zgjedhjet lokale të vitit 2013. Në seancat e mëparshme për këtë rast, PSP-ja ka paraqitur si dëshmi biseda telefonike dhe SMS porosi që rrjedhin nga biseda të përgjuara në mënyrë të paligjshme. Për rastin “Titanik” akuzohen 21 persona, në mesin e të cilëve edhe ish kryeministri Nikolla Gruevski, ish-Sekretar i Përgjithshëm i Qeverisë, Kirill Bozhinovski ,ish Ministrat Mile Janakieski, Gordana Jankullovska, Biljana Brishkovska-Boshkovski.

Të pandehurit dyshohen për shoqërim kriminel, shkelje të të drejtës zgjedhore, shkelje të lirisë së përcaktimit të votuesve, ryshfet gjatë zgjedhjeve dhe votimit, shkatërrim të materialit zgjedhor dhe keqpërdorim të mjeteve për financimin e fushatës parazgjedhore.